Eitlakrabbamein – Hodgkin´s sjúkdómur

Um 7,200 tilfelli greinast árlega í Bandaríkjunum af Hodgkin´s sjúkdómi. Á undanförnum áratugum hafa framfarir í lyfja- og geislameðferð þrefaldað fjölda þeirra sem læknast af Hodgkin´s sjúkdómi. Í dag er unnt að lækna um 75% þeirra sem greinast með sjúkdóminn.

Faraldsfræði:

Kynjahlutfallið er 1,3 karlar fyrir hverja 1,0 konu sem greind er með sjúkdóminn.

Nýgengi sjúkdómsins er algengast á þriðja tug ævinnar og síðar er aftur smávægileg aukning á nýgengi á sextugsaldri.

Áhættuþættir:

Orsök Hodgkin´s sjúkdóms er óþekkt. Getum er að því leitt að ýmsir þættir auki líkur á sjúkdómnum. Þeirra á meðal eru erfðaþættir og veirusýkingar.

Einkenni:

Hodgkin´s sjúkdómur er illkynja vöxtur fruma í eitlum líkamans og sjaldnar í öðrum líffærum (milta, lifur, lungu og beinmergur). Flestir sjúklingar hafa eitlastækkanir ofan þindar. Algengar eitlastöðvar eru á hálsi, handarkrikum og nárum. Lungnamynd sýnir oft eitlastækkanir í miðmæti sem er svæðið á milli lungnanna.

Nær helmingur sjúklinga hefur auk eitlastækkana svokölluð B-einkenni. Þau eru hiti, nætursviti og þyngdartap. Sumir kvarta um kláða.

Sjúkdómsgreining:

Yfirleitt er aðgengilegur eitill tekinn með lítilli skurðaðgerð. Varast ber fínnálarsýni sem oftar en ekki gefa ekki nægilega góða mynd af eitilvefnum.

Meinafræði:

Reed-Sternberg fruma er einkenni Hodgkins-sjúkdóms. Sjúkdómurinn er flokkaður í nokkra undirflokka eftir vefjagerð og ónæmisfræðilegri myndgerð.

Stigun:

Stig sjúkdómsins eru fjögur allt eftir útbreiðslu og hvort sjúkdómurinn sé beggja vegna þindar eða ekki.

Meðferð:

Meðferð byggir á geisla- og/eða lyfjameðferð allt eftir útbreiðslu sjúkdómsins.